SCROLL I-4
1
οἳ δὲ θεοὶ πὰρ Ζηνὶ καθήμενοι ἠγορόωντο
Translation
But the gods were meeting in assembly, sitting next to Zeus
2
χρυσέῳ ἐν δαπέδῳ, μετὰ δέ σφισι πότνια Ἥβη
Translation
in the golden hall, and among them revered Hebe
3
νέκταρ ἐοινοχόει· τοὶ δὲ χρυσέοις δεπάεσσι
Translation
was pouring nectar; and with golden cups they
4
δειδέχατʼ ἀλλήλους, Τρώων πόλιν εἰσορόωντες·
Translation
greeted each other, looking down at the city of the Trojans.
5
αὐτίκʼ ἐπειρᾶτο Κρονίδης ἐρεθιζέμεν Ἥρην
Translation
All at once the son of Kronos tried to provoke Hera
6
κερτομίοις ἐπέεσσι παραβλήδην ἀγορεύων·
Translation
with taunting words, risking a fight by saying in assembly,
7
δοιαὶ μὲν Μενελάῳ ἀρηγόνες εἰσὶ θεάων
Translation
Two of the goddesses are supporters of Menelaos,
8
Ἥρη τʼ Ἀργείη καὶ Ἀλαλκομενηῒς Ἀθήνη.
Translation
Argive Hera and Alalkomenian Athena,
9
ἀλλʼ ἤτοι ταὶ νόσφι καθήμεναι εἰσορόωσαι
Translation
but they, sitting apart and looking on,
10
τέρπεσθον· τῷ δʼ αὖτε φιλομειδὴς Ἀφροδίτη
Translation
are enjoying themselves; to the side of the other one, Paris, laughter-loving Aphrodite
11
αἰεὶ παρμέμβλωκε καὶ αὐτοῦ κῆρας ἀμύνει·
Translation
always comes and keeps death away from him,
12
καὶ νῦν ἐξεσάωσεν ὀϊόμενον θανέεσθαι.
Translation
and this time too she has rescued him when he thought he would die.
13
ἀλλʼ ἤτοι νίκη μὲν ἀρηϊφίλου Μενελάου·
Translation
Still the victory belongs to Menelaos, dear to Ares;
14
ἡμεῖς δὲ φραζώμεθʼ ὅπως ἔσται τάδε ἔργα,
Translation
let us then consider how these things will be,
15
ἤ ῥʼ αὖτις πόλεμόν τε κακὸν καὶ φύλοπιν αἰνὴν
Translation
whether again evil war and terrible battle
16
ὄρσομεν, ἦ φιλότητα μετʼ ἀμφοτέροισι βάλωμεν.
Translation
we stir up, or whether we make friendship between both sides.
17
εἰ δʼ αὖ πως τόδε πᾶσι φίλον καὶ ἡδὺ γένοιτο,
Translation
If somehow the second choice should prove dear and sweet to everyone,
18
ἤτοι μὲν οἰκέοιτο πόλις Πριάμοιο ἄνακτος,
Translation
the city of lord Priam would remain inhabited,
19
αὖτις δʼ Ἀργείην Ἑλένην Μενέλαος ἄγοιτο.
Translation
and Menelaos would again conduct Argive Helen home.“
20
ὣς ἔφαθʼ, αἳ δʼ ἐπέμυξαν Ἀθηναίη τε καὶ Ἥρη·
Translation
Thus he spoke, and Athena and Hera muttered at it.
21
πλησίαι αἵ γʼ ἥσθην, κακὰ δὲ Τρώεσσι μεδέσθην.
Translation
They were sitting next to each other, plotting evils against the Trojans.
22
ἤτοι Ἀθηναίη ἀκέων ἦν οὐδέ τι εἶπε
Translation
Athena for her part was silent and did not say anything,
23
σκυζομένη Διὶ πατρί, χόλος δέ μιν ἄγριος ᾕρει·
Translation
resenting father Zeus, and savage fury was taking hold of her;
24
Ἥρῃ δʼ οὐκ ἔχαδε στῆθος χόλον, ἀλλὰ προσηύδα·
Translation
Hera’s chest did not contain her fury, but she addressed him,
25
αἰνότατε Κρονίδη ποῖον τὸν μῦθον ἔειπες·
Translation
Most terrible son of Kronos, what sort of words have you spoken?
26
πῶς ἐθέλεις ἅλιον θεῖναι πόνον ἠδʼ ἀτέλεστον,
Translation
How can you wish to make my labor useless and unfulfilled,
27
ἱδρῶ θʼ ὃν ἵδρωσα μόγῳ, καμέτην δέ μοι ἵπποι
Translation
and the sweat that I sweated in my toil? My horses also wore themselves out
28
λαὸν ἀγειρούσῃ, Πριάμῳ κακὰ τοῖό τε παισίν.
Translation
as I gathered the warriors, an evil for Priam and his sons.
29
ἕρδʼ· ἀτὰρ οὔ τοι πάντες ἐπαινέομεν θεοὶ ἄλλοι.
Translation
Do it, but all the rest of us gods will not approve of you.“
30
τὴν δὲ μέγʼ ὀχθήσας προσέφη νεφεληγερέτα Ζεύς·
Translation
Greatly troubled, the cloud-gatherer Zeus addressed her,
31
δαιμονίη τί νύ σε Πρίαμος Πριάμοιό τε παῖδες
Translation
What possesses you [daimōniē]? How do Priam and Priam’s sons
32
τόσσα κακὰ ῥέζουσιν, ὅ τʼ ἀσπερχὲς μενεαίνεις
Translation
do such great evils to you that you strive relentlessly
33
Ἰλίου ἐξαλαπάξαι ἐϋκτίμενον πτολίεθρον;
Translation
to destroy the well-built citadel of Ilion?
34
εἰ δὲ σύ γʼ εἰσελθοῦσα πύλας καὶ τείχεα μακρὰ
Translation
If you entered the gates and high walls
35
ὠμὸν βεβρώθοις Πρίαμον Πριάμοιό τε παῖδας
Translation
and ate Priam raw, and Priam’s sons,
36
ἄλλους τε Τρῶας, τότε κεν χόλον ἐξακέσαιο.
Translation
and the rest of the Trojans, then you would find a cure for your fury.
37
ἕρξον ὅπως ἐθέλεις· μὴ τοῦτό γε νεῖκος ὀπίσσω
Translation
Do as you wish, so that later this quarrel
38
σοὶ καὶ ἐμοὶ μέγʼ ἔρισμα μετʼ ἀμφοτέροισι γένηται.
Translation
will not become for you and me a great strife between us both.
39
ἄλλο δέ τοι ἐρέω, σὺ δʼ ἐνὶ φρεσὶ βάλλεο σῇσιν·
Translation
But I have something else to tell you, and you put it in your mind:
40
ὁππότε κεν καὶ ἐγὼ μεμαὼς πόλιν ἐξαλαπάξαι
Translation
Whenever I am eager to destroy a city
41
τὴν ἐθέλω ὅθι τοι φίλοι ἀνέρες ἐγγεγάασι,
Translation
that I choose, where men dear to you have been born,
42
μή τι διατρίβειν τὸν ἐμὸν χόλον, ἀλλά μʼ ἐᾶσαι·
Translation
don’t try to delay my fury, but leave me alone.
43
καὶ γὰρ ἐγὼ σοὶ δῶκα ἑκὼν ἀέκοντί γε θυμῷ·
Translation
For I have given to you willingly what you ask, but my heart [thumos] is unwilling:
44
αἳ γὰρ ὑπʼ ἠελίῳ τε καὶ οὐρανῷ ἀστερόεντι
Translation
of cities under the sun and the star-filled heaven
45
ναιετάουσι πόληες ἐπιχθονίων ἀνθρώπων,
Translation
that are inhabited by men on earth
46
τάων μοι περὶ κῆρι τιέσκετο Ἴλιος ἱρὴ
Translation
honored in my heart beyond others was holy Troy,
47
καὶ Πρίαμος καὶ λαὸς ἐϋμμελίω Πριάμοιο.
Translation
and Priam, and the warriors of Priam, wielder of the good ash spear.
48
οὐ γάρ μοί ποτε βωμὸς ἐδεύετο δαιτὸς ἐΐσης
Translation
For my altar never lacked its fair share of the feast,
49
λοιβῆς τε κνίσης τε· τὸ γὰρ λάχομεν γέρας ἡμεῖς.
Translation
of drink offering and of fat, since that is the prize [geras] that has been allotted to us.“
50
τὸν δʼ ἠμείβετʼ ἔπειτα βοῶπις πότνια Ἥρη·
Translation
Then revered, ox-radiant Hera answered him,
51
ἤτοι ἐμοὶ τρεῖς μὲν πολὺ φίλταταί εἰσι πόληες
Translation
I tell you that three cities are by far the dearest [philos] to me,
52
Ἄργός τε Σπάρτη τε καὶ εὐρυάγυια Μυκήνη·
Translation
Argos, and Sparta, and Mycenae whose streets are wide;
53
τὰς διαπέρσαι ὅτʼ ἄν τοι ἀπέχθωνται περὶ κῆρι·
Translation
destroy these cities whenever they become hateful beyond others to you in your heart.
54
τάων οὔ τοι ἐγὼ πρόσθʼ ἵσταμαι οὐδὲ μεγαίρω.
Translation
I don’t take a stand in front of them or begrudge them to you.
55
εἴ περ γὰρ φθονέω τε καὶ οὐκ εἰῶ διαπέρσαι,
Translation
Even if I do object and do not allow you to destroy them,
56
οὐκ ἀνύω φθονέουσʼ ἐπεὶ ἦ πολὺ φέρτερός ἐσσι.
Translation
I won’t accomplish anything by objecting, since you are much superior.
57
ἀλλὰ χρὴ καὶ ἐμὸν θέμεναι πόνον οὐκ ἀτέλεστον·
Translation
But my labor [ponos] must not go unfulfilled;
58
καὶ γὰρ ἐγὼ θεός εἰμι, γένος δέ μοι ἔνθεν ὅθεν σοί,
Translation
for I too am a god, and my origin [genos] is the same as yours,
59
καί με πρεσβυτάτην τέκετο Κρόνος ἀγκυλομήτης,
Translation
and Kronos the crooked deviser fathered me most senior
60
ἀμφότερον γενεῇ τε καὶ οὕνεκα σὴ παράκοιτις
Translation
on both sides, because of my descent and because your wife
61
κέκλημαι, σὺ δὲ πᾶσι μετʼ ἀθανάτοισιν ἀνάσσεις.
Translation
I am called, and you lord it over all the immortals.
62
ἀλλʼ ἤτοι μὲν ταῦθʼ ὑποείξομεν ἀλλήλοισι,
Translation
But come let us yield to each other in this,
63
σοὶ μὲν ἐγώ, σὺ δʼ ἐμοί· ἐπὶ δʼ ἕψονται θεοὶ ἄλλοι
Translation
I to you and you to me; the other gods will follow,
64
ἀθάνατοι· σὺ δὲ θᾶσσον Ἀθηναίῃ ἐπιτεῖλαι
Translation
the immortals. And you, quick, command Athena
65
ἐλθεῖν ἐς Τρώων καὶ Ἀχαιῶν φύλοπιν αἰνήν,
Translation
to go into the dread battle of the Trojans and Achaeans
66
πειρᾶν δʼ ὥς κε Τρῶες ὑπερκύδαντας Ἀχαιοὺς
Translation
and try to make the Trojans, before the Achaeans whose glory [kudos] surpasses all,
67
ἄρξωσι πρότεροι ὑπὲρ ὅρκια δηλήσασθαι.
Translation
be the first to cause harm in violation of the oaths.“
68
ὣς ἔφατʼ, οὐδʼ ἀπίθησε πατὴρ ἀνδρῶν τε θεῶν τε·
Translation
So she spoke, and the father of men and gods did not disregard it.
69
αὐτίκʼ Ἀθηναίην ἔπεα πτερόεντα προσηύδα·
Translation
Immediately he addressed winged words to Athena,
70
αἶψα μάλʼ ἐς στρατὸν ἐλθὲ μετὰ Τρῶας καὶ Ἀχαιούς,
Translation
Right away, go to the massed warriors of the Trojans and Achaeans
71
πειρᾶν δʼ ὥς κε Τρῶες ὑπερκύδαντας Ἀχαιοὺς
Translation
and try to make the Trojans before the Achaeans whose glory [kudos] surpasses all,
72
ἄρξωσι πρότεροι ὑπὲρ ὅρκια δηλήσασθαι.
Translation
be the first to cause harm in violation of the oaths.“
73
ὣς εἰπὼν ὄτρυνε πάρος μεμαυῖαν Ἀθήνην,
Translation
Saying this he stirred up Athena, already eager,
74
βῆ δὲ κατʼ Οὐλύμποιο καρήνων ἀΐξασα.
Translation
and she went darting down from the peaks of Olympos.
75
οἷον δʼ ἀστέρα ἧκε Κρόνου πάϊς ἀγκυλομήτεω
Translation
Like a star shot by the son of Kronos whose plans are devious,
76
ἢ ναύτῃσι τέρας ἠὲ στρατῷ εὐρέϊ λαῶν
Translation
a portent for either sailors or widely massed warriors,
77
λαμπρόν· τοῦ δέ τε πολλοὶ ἀπὸ σπινθῆρες ἵενται·
Translation
bright, and many sparks are sent from it
78
τῷ ἐϊκυῖʼ ἤϊξεν ἐπὶ χθόνα Παλλὰς Ἀθήνη,
79
κὰδ δʼ ἔθορʼ ἐς μέσσον· θάμβος δʼ ἔχεν εἰσορόωντας
80
Τρῶάς θʼ ἱπποδάμους καὶ ἐϋκνήμιδας Ἀχαιούς·
81
ὧδε δέ τις εἴπεσκεν ἰδὼν ἐς πλησίον ἄλλον·
82
ἦ ῥʼ αὖτις πόλεμός τε κακὸς καὶ φύλοπις αἰνὴ
83
ἔσσεται, ἢ φιλότητα μετʼ ἀμφοτέροισι τίθησι
84
Ζεύς, ὅς τʼ ἀνθρώπων ταμίης πολέμοιο τέτυκται.
85
ὣς ἄρα τις εἴπεσκεν Ἀχαιῶν τε Τρώων τε.
86
ἣ δʼ ἀνδρὶ ἰκέλη Τρώων κατεδύσεθʼ ὅμιλον
87
Λαοδόκῳ Ἀντηνορίδῃ κρατερῷ αἰχμητῇ,
88
Πάνδαρον ἀντίθεον διζημένη εἴ που ἐφεύροι.
89
εὗρε Λυκάονος υἱὸν ἀμύμονά τε κρατερόν τε
90
ἑσταότʼ· ἀμφὶ δέ μιν κρατεραὶ στίχες ἀσπιστάων
91
λαῶν, οἵ οἱ ἕποντο ἀπʼ Αἰσήποιο ῥοάων·
92
ἀγχοῦ δʼ ἱσταμένη ἔπεα πτερόεντα προσηύδα·
93
ἦ ῥά νύ μοί τι πίθοιο Λυκάονος υἱὲ δαΐφρον.
94
τλαίης κεν Μενελάῳ ἐπιπροέμεν ταχὺν ἰόν,
95
πᾶσι δέ κε Τρώεσσι χάριν καὶ κῦδος ἄροιο,
96
ἐκ πάντων δὲ μάλιστα Ἀλεξάνδρῳ βασιλῆϊ.
97
τοῦ κεν δὴ πάμπρωτα παρʼ ἀγλαὰ δῶρα φέροιο,
98
αἴ κεν ἴδῃ Μενέλαον ἀρήϊον Ἀτρέος υἱὸν
99
σῷ βέλεϊ δμηθέντα πυρῆς ἐπιβάντʼ ἀλεγεινῆς.
100
ἀλλʼ ἄγʼ ὀΐστευσον Μενελάου κυδαλίμοιο,
101
εὔχεο δʼ Ἀπόλλωνι Λυκηγενέϊ κλυτοτόξῳ
102
ἀρνῶν πρωτογόνων ῥέξειν κλειτὴν ἑκατόμβην
103
οἴκαδε νοστήσας ἱερῆς εἰς ἄστυ Ζελείης.
104
ὣς φάτʼ Ἀθηναίη, τῷ δὲ φρένας ἄφρονι πεῖθεν·
105
αὐτίκʼ ἐσύλα τόξον ἐΰξοον ἰξάλου αἰγὸς
106
ἀγρίου, ὅν ῥά ποτʼ αὐτὸς ὑπὸ στέρνοιο τυχήσας
107
πέτρης ἐκβαίνοντα δεδεγμένος ἐν προδοκῇσι
108
βεβλήκει πρὸς στῆθος· ὃ δʼ ὕπτιος ἔμπεσε πέτρῃ.
109
τοῦ κέρα ἐκ κεφαλῆς ἑκκαιδεκάδωρα πεφύκει·
110
καὶ τὰ μὲν ἀσκήσας κεραοξόος ἤραρε τέκτων,
111
πᾶν δʼ εὖ λειήνας χρυσέην ἐπέθηκε κορώνην.
112
καὶ τὸ μὲν εὖ κατέθηκε τανυσσάμενος ποτὶ γαίῃ
113
ἀγκλίνας· πρόσθεν δὲ σάκεα σχέθον ἐσθλοὶ ἑταῖροι
114
μὴ πρὶν ἀναΐξειαν ἀρήϊοι υἷες Ἀχαιῶν
115
πρὶν βλῆσθαι Μενέλαον ἀρήϊον Ἀτρέος υἱόν.
116
αὐτὰρ ὁ σύλα πῶμα φαρέτρης, ἐκ δʼ ἕλετʼ ἰὸν
117
ἀβλῆτα πτερόεντα μελαινέων ἕρμʼ ὀδυνάων·
118
αἶψα δʼ ἐπὶ νευρῇ κατεκόσμει πικρὸν ὀϊστόν,
119
εὔχετο δʼ Ἀπόλλωνι Λυκηγενέϊ κλυτοτόξῳ
120
ἀρνῶν πρωτογόνων ῥέξειν κλειτὴν ἑκατόμβην
121
οἴκαδε νοστήσας ἱερῆς εἰς ἄστυ Ζελείης.
122
ἕλκε δʼ ὁμοῦ γλυφίδας τε λαβὼν καὶ νεῦρα βόεια·
123
νευρὴν μὲν μαζῷ πέλασεν, τόξῳ δὲ σίδηρον.
124
αὐτὰρ ἐπεὶ δὴ κυκλοτερὲς μέγα τόξον ἔτεινε,
125
λίγξε βιός, νευρὴ δὲ μέγʼ ἴαχεν, ἆλτο δʼ ὀϊστὸς
126
ὀξυβελὴς καθʼ ὅμιλον ἐπιπτέσθαι μενεαίνων.
127
οὐδὲ σέθεν Μενέλαε θεοὶ μάκαρες λελάθοντο
128
ἀθάνατοι, πρώτη δὲ Διὸς θυγάτηρ ἀγελείη,
129
ἥ τοι πρόσθε στᾶσα βέλος ἐχεπευκὲς ἄμυνεν.
130
ἣ δὲ τόσον μὲν ἔεργεν ἀπὸ χροὸς ὡς ὅτε μήτηρ
131
παιδὸς ἐέργῃ μυῖαν ὅθʼ ἡδέϊ λέξεται ὕπνῳ,
132
αὐτὴ δʼ αὖτʼ ἴθυνεν ὅθι ζωστῆρος ὀχῆες
133
χρύσειοι σύνεχον καὶ διπλόος ἤντετο θώρηξ.
134
ἐν δʼ ἔπεσε ζωστῆρι ἀρηρότι πικρὸς ὀϊστός·
135
διὰ μὲν ἂρ ζωστῆρος ἐλήλατο δαιδαλέοιο,
136
καὶ διὰ θώρηκος πολυδαιδάλου ἠρήρειστο
137
μίτρης θʼ, ἣν ἐφόρει ἔρυμα χροὸς ἕρκος ἀκόντων,
138
ἥ οἱ πλεῖστον ἔρυτο· διὰ πρὸ δὲ εἴσατο καὶ τῆς.
139
ἀκρότατον δʼ ἄρʼ ὀϊστὸς ἐπέγραψε χρόα φωτός·
140
αὐτίκα δʼ ἔρρεεν αἷμα κελαινεφὲς ἐξ ὠτειλῆς.
141
ὡς δʼ ὅτε τίς τʼ ἐλέφαντα γυνὴ φοίνικι μιήνῃ
142
Μῃονὶς ἠὲ Κάειρα παρήϊον ἔμμεναι ἵππων·
143
κεῖται δʼ ἐν θαλάμῳ, πολέες τέ μιν ἠρήσαντο
144
ἱππῆες φορέειν· βασιλῆϊ δὲ κεῖται ἄγαλμα,
145
ἀμφότερον κόσμός θʼ ἵππῳ ἐλατῆρί τε κῦδος·
146
τοῖοί τοι Μενέλαε μιάνθην αἵματι μηροὶ
147
εὐφυέες κνῆμαί τε ἰδὲ σφυρὰ κάλʼ ὑπένερθε.
148
ῥίγησεν δʼ ἄρʼ ἔπειτα ἄναξ ἀνδρῶν Ἀγαμέμνων
149
ὡς εἶδεν μέλαν αἷμα καταρρέον ἐξ ὠτειλῆς·
150
ῥίγησεν δὲ καὶ αὐτὸς ἀρηΐφιλος Μενέλαος.
151
ὡς δὲ ἴδεν νεῦρόν τε καὶ ὄγκους ἐκτὸς ἐόντας
152
ἄψορρόν οἱ θυμὸς ἐνὶ στήθεσσιν ἀγέρθη.
153
τοῖς δὲ βαρὺ στενάχων μετέφη κρείων Ἀγαμέμνων
154
χειρὸς ἔχων Μενέλαον, ἐπεστενάχοντο δʼ ἑταῖροι·
155
φίλε κασίγνητε θάνατόν νύ τοι ὅρκιʼ ἔταμνον
156
οἶον προστήσας πρὸ Ἀχαιῶν Τρωσὶ μάχεσθαι,
157
ὥς σʼ ἔβαλον Τρῶες, κατὰ δʼ ὅρκια πιστὰ πάτησαν.
158
οὐ μέν πως ἅλιον πέλει ὅρκιον αἷμά τε ἀρνῶν
159
σπονδαί τʼ ἄκρητοι καὶ δεξιαὶ ᾗς ἐπέπιθμεν.
160
εἴ περ γάρ τε καὶ αὐτίκʼ Ὀλύμπιος οὐκ ἐτέλεσσεν,
161
ἔκ τε καὶ ὀψὲ τελεῖ, σύν τε μεγάλῳ ἀπέτισαν
162
σὺν σφῇσιν κεφαλῇσι γυναιξί τε καὶ τεκέεσσιν.
163
εὖ γὰρ ἐγὼ τόδε οἶδα κατὰ φρένα καὶ κατὰ θυμόν·
164
ἔσσεται ἦμαρ ὅτʼ ἄν ποτʼ ὀλώλῃ Ἴλιος ἱρὴ
165
καὶ Πρίαμος καὶ λαὸς ἐϋμμελίω Πριάμοιο,
166
Ζεὺς δέ σφι Κρονίδης ὑψίζυγος αἰθέρι ναίων
167
αὐτὸς ἐπισσείῃσιν ἐρεμνὴν αἰγίδα πᾶσι
168
τῆσδʼ ἀπάτης κοτέων· τὰ μὲν ἔσσεται οὐκ ἀτέλεστα·
169
ἀλλά μοι αἰνὸν ἄχος σέθεν ἔσσεται ὦ Μενέλαε
170
αἴ κε θάνῃς καὶ πότμον ἀναπλήσῃς βιότοιο.
171
καί κεν ἐλέγχιστος πολυδίψιον Ἄργος ἱκοίμην·
172
αὐτίκα γὰρ μνήσονται Ἀχαιοὶ πατρίδος αἴης·
173
κὰδ δέ κεν εὐχωλὴν Πριάμῳ καὶ Τρωσὶ λίποιμεν
174
Ἀργείην Ἑλένην· σέο δʼ ὀστέα πύσει ἄρουρα
175
κειμένου ἐν Τροίῃ ἀτελευτήτῳ ἐπὶ ἔργῳ.
176
καί κέ τις ὧδʼ ἐρέει Τρώων ὑπερηνορεόντων
177
τύμβῳ ἐπιθρῴσκων Μενελάου κυδαλίμοιο·
178
αἴθʼ οὕτως ἐπὶ πᾶσι χόλον τελέσειʼ Ἀγαμέμνων,
179
ὡς καὶ νῦν ἅλιον στρατὸν ἤγαγεν ἐνθάδʼ Ἀχαιῶν,
180
καὶ δὴ ἔβη οἶκον δὲ φίλην ἐς πατρίδα γαῖαν
181
σὺν κεινῇσιν νηυσὶ λιπὼν ἀγαθὸν Μενέλαον.
182
ὥς ποτέ τις ἐρέει· τότε μοι χάνοι εὐρεῖα χθών.
183
τὸν δʼ ἐπιθαρσύνων προσέφη ξανθὸς Μενέλαος·
184
θάρσει, μηδέ τί πω δειδίσσεο λαὸν Ἀχαιῶν·
185
οὐκ ἐν καιρίῳ ὀξὺ πάγη βέλος, ἀλλὰ πάροιθεν
186
εἰρύσατο ζωστήρ τε παναίολος ἠδʼ ὑπένερθε
187
ζῶμά τε καὶ μίτρη, τὴν χαλκῆες κάμον ἄνδρες.
188
τὸν δʼ ἀπαμειβόμενος προσέφη κρείων Ἀγαμέμνων·
189
αἲ γὰρ δὴ οὕτως εἴη φίλος ὦ Μενέλαε·
190
ἕλκος δʼ ἰητὴρ ἐπιμάσσεται ἠδʼ ἐπιθήσει
191
φάρμαχʼ ἅ κεν παύσῃσι μελαινάων ὀδυνάων.
192
ἦ καὶ Ταλθύβιον θεῖον κήρυκα προσηύδα·
193
Ταλθύβιʼ ὅττι τάχιστα Μαχάονα δεῦρο κάλεσσον
194
φῶτʼ Ἀσκληπιοῦ υἱὸν ἀμύμονος ἰητῆρος,
195
ὄφρα ἴδῃ Μενέλαον ἀρήϊον Ἀτρέος υἱόν,
196
ὅν τις ὀϊστεύσας ἔβαλεν τόξων ἐῢ εἰδὼς
197
Τρώων ἢ Λυκίων, τῷ μὲν κλέος, ἄμμι δὲ πένθος.
198
ὣς ἔφατʼ, οὐδʼ ἄρα οἱ κῆρυξ ἀπίθησεν ἀκούσας,
199
βῆ δʼ ἰέναι κατὰ λαὸν Ἀχαιῶν χαλκοχιτώνων
200
παπταίνων ἥρωα Μαχάονα· τὸν δὲ νόησεν
201
ἑσταότʼ· ἀμφὶ δέ μιν κρατεραὶ στίχες ἀσπιστάων
202
λαῶν, οἵ οἱ ἕποντο Τρίκης ἐξ ἱπποβότοιο.
203
ἀγχοῦ δʼ ἱστάμενος ἔπεα πτερόεντα προσηύδα·
204
ὄρσʼ Ἀσκληπιάδη, καλέει κρείων Ἀγαμέμνων,
205
ὄφρα ἴδῃς Μενέλαον ἀρήϊον ἀρχὸν Ἀχαιῶν,
206
ὅν τις ὀϊστεύσας ἔβαλεν τόξων ἐῢ εἰδὼς
207
Τρώων ἢ Λυκίων, τῷ μὲν κλέος, ἄμμι δὲ πένθος.
208
ὣς φάτο, τῷ δʼ ἄρα θυμὸν ἐνὶ στήθεσσιν ὄρινε·
209
βὰν δʼ ἰέναι καθʼ ὅμιλον ἀνὰ στρατὸν εὐρὺν Ἀχαιῶν.
210
ἀλλʼ ὅτε δή ῥʼ ἵκανον ὅθι ξανθὸς Μενέλαος
211
βλήμενος ἦν, περὶ δʼ αὐτὸν ἀγηγέραθʼ ὅσσοι ἄριστοι
212
κυκλόσʼ, ὃ δʼ ἐν μέσσοισι παρίστατο ἰσόθεος φώς,
213
αὐτίκα δʼ ἐκ ζωστῆρος ἀρηρότος ἕλκεν ὀϊστόν·
214
τοῦ δʼ ἐξελκομένοιο πάλιν ἄγεν ὀξέες ὄγκοι.
215
λῦσε δέ οἱ ζωστῆρα παναίολον ἠδʼ ὑπένερθε
216
ζῶμά τε καὶ μίτρην, τὴν χαλκῆες κάμον ἄνδρες.
217
αὐτὰρ ἐπεὶ ἴδεν ἕλκος ὅθʼ ἔμπεσε πικρὸς ὀϊστός,
218
αἷμʼ ἐκμυζήσας ἐπʼ ἄρʼ ἤπια φάρμακα εἰδὼς
219
πάσσε, τά οἵ ποτε πατρὶ φίλα φρονέων πόρε Χείρων.
220
ὄφρα τοὶ ἀμφεπένοντο βοὴν ἀγαθὸν Μενέλαον,
221
τόφρα δʼ ἐπὶ Τρώων στίχες ἤλυθον ἀσπιστάων·
222
οἳ δʼ αὖτις κατὰ τεύχεʼ ἔδυν, μνήσαντο δὲ χάρμης.
223
ἔνθʼ οὐκ ἂν βρίζοντα ἴδοις Ἀγαμέμνονα δῖον
224
οὐδὲ καταπτώσσοντʼ οὐδʼ οὐκ ἐθέλοντα μάχεσθαι,
225
ἀλλὰ μάλα σπεύδοντα μάχην ἐς κυδιάνειραν.
226
ἵππους μὲν γὰρ ἔασε καὶ ἅρματα ποικίλα χαλκῷ·
227
καὶ τοὺς μὲν θεράπων ἀπάνευθʼ ἔχε φυσιόωντας
228
Εὐρυμέδων υἱὸς Πτολεμαίου Πειραΐδαο·
229
τῷ μάλα πόλλʼ ἐπέτελλε παρισχέμεν ὁππότε κέν μιν
230
γυῖα λάβῃ κάματος πολέας διὰ κοιρανέοντα·
231
αὐτὰρ ὃ πεζὸς ἐὼν ἐπεπωλεῖτο στίχας ἀνδρῶν·
232
καί ῥʼ οὓς μὲν σπεύδοντας ἴδοι Δαναῶν ταχυπώλων,
233
τοὺς μάλα θαρσύνεσκε παριστάμενος ἐπέεσσιν·
234
Ἀργεῖοι μή πώ τι μεθίετε θούριδος ἀλκῆς·
235
οὐ γὰρ ἐπὶ ψευδέσσι πατὴρ Ζεὺς ἔσσετʼ ἀρωγός,
236
ἀλλʼ οἵ περ πρότεροι ὑπὲρ ὅρκια δηλήσαντο
237
τῶν ἤτοι αὐτῶν τέρενα χρόα γῦπες ἔδονται,
238
ἡμεῖς αὖτʼ ἀλόχους τε φίλας καὶ νήπια τέκνα
239
ἄξομεν ἐν νήεσσιν, ἐπὴν πτολίεθρον ἕλωμεν.
240
οὕς τινας αὖ μεθιέντας ἴδοι στυγεροῦ πολέμοιο,
241
τοὺς μάλα νεικείεσκε χολωτοῖσιν ἐπέεσσιν·
242
Ἀργεῖοι ἰόμωροι ἐλεγχέες οὔ νυ σέβεσθε;
243
τίφθʼ οὕτως ἔστητε τεθηπότες ἠΰτε νεβροί,
244
αἵ τʼ ἐπεὶ οὖν ἔκαμον πολέος πεδίοιο θέουσαι
245
ἑστᾶσʼ, οὐδʼ ἄρα τίς σφι μετὰ φρεσὶ γίγνεται ἀλκή·
246
ὣς ὑμεῖς ἔστητε τεθηπότες οὐδὲ μάχεσθε.
247
ἦ μένετε Τρῶας σχεδὸν ἐλθέμεν ἔνθά τε νῆες
248
εἰρύατʼ εὔπρυμνοι πολιῆς ἐπὶ θινὶ θαλάσσης,
249
ὄφρα ἴδητʼ αἴ κʼ ὔμμιν ὑπέρσχῃ χεῖρα Κρονίων;
250
ὣς ὅ γε κοιρανέων ἐπεπωλεῖτο στίχας ἀνδρῶν·
251
ἦλθε δʼ ἐπὶ Κρήτεσσι κιὼν ἀνὰ οὐλαμὸν ἀνδρῶν.
252
οἳ δʼ ἀμφʼ Ἰδομενῆα δαΐφρονα θωρήσσοντο·
253
Ἰδομενεὺς μὲν ἐνὶ προμάχοις συῒ εἴκελος ἀλκήν,
254
Μηριόνης δʼ ἄρα οἱ πυμάτας ὄτρυνε φάλαγγας.
255
τοὺς δὲ ἰδὼν γήθησεν ἄναξ ἀνδρῶν Ἀγαμέμνων,
256
αὐτίκα δʼ Ἰδομενῆα προσηύδα μειλιχίοισιν·
257
Ἰδομενεῦ περὶ μέν σε τίω Δαναῶν ταχυπώλων
258
ἠμὲν ἐνὶ πτολέμῳ ἠδʼ ἀλλοίῳ ἐπὶ ἔργῳ
259
ἠδʼ ἐν δαίθʼ, ὅτε πέρ τε γερούσιον αἴθοπα οἶνον
260
Ἀργείων οἳ ἄριστοι ἐνὶ κρητῆρι κέρωνται.
261
εἴ περ γάρ τʼ ἄλλοι γε κάρη κομόωντες Ἀχαιοὶ
262
δαιτρὸν πίνωσιν, σὸν δὲ πλεῖον δέπας αἰεὶ
263
ἕστηχʼ, ὥς περ ἐμοί, πιέειν ὅτε θυμὸς ἀνώγοι.
264
ἀλλʼ ὄρσευ πόλεμον δʼ οἷος πάρος εὔχεαι εἶναι.
265
τὸν δʼ αὖτʼ Ἰδομενεὺς Κρητῶν ἀγὸς ἀντίον ηὔδα·
266
Ἀτρεΐδη μάλα μέν τοι ἐγὼν ἐρίηρος ἑταῖρος
267
ἔσσομαι, ὡς τὸ πρῶτον ὑπέστην καὶ κατένευσα·
268
ἀλλʼ ἄλλους ὄτρυνε κάρη κομόωντας Ἀχαιοὺς
269
ὄφρα τάχιστα μαχώμεθʼ, ἐπεὶ σύν γʼ ὅρκιʼ ἔχευαν
270
Τρῶες· τοῖσιν δʼ αὖ θάνατος καὶ κήδεʼ ὀπίσσω
271
ἔσσετʼ ἐπεὶ πρότεροι ὑπὲρ ὅρκια δηλήσαντο.
272
ὣς ἔφατʼ, Ἀτρεΐδης δὲ παρῴχετο γηθόσυνος κῆρ·
273
ἦλθε δʼ ἐπʼ Αἰάντεσσι κιὼν ἀνὰ οὐλαμὸν ἀνδρῶν·
274
τὼ δὲ κορυσσέσθην, ἅμα δὲ νέφος εἵπετο πεζῶν.
275
ὡς δʼ ὅτʼ ἀπὸ σκοπιῆς εἶδεν νέφος αἰπόλος ἀνὴρ
276
ἐρχόμενον κατὰ πόντον ὑπὸ Ζεφύροιο ἰωῆς·
277
τῷ δέ τʼ ἄνευθεν ἐόντι μελάντερον ἠΰτε πίσσα
278
φαίνετʼ ἰὸν κατὰ πόντον, ἄγει δέ τε λαίλαπα πολλήν,
279
ῥίγησέν τε ἰδών, ὑπό τε σπέος ἤλασε μῆλα·
280
τοῖαι ἅμʼ Αἰάντεσσι διοτρεφέων αἰζηῶν
281
δήϊον ἐς πόλεμον πυκιναὶ κίνυντο φάλαγγες
282
κυάνεαι, σάκεσίν τε καὶ ἔγχεσι πεφρικυῖαι.
283
καὶ τοὺς μὲν γήθησεν ἰδὼν κρείων Ἀγαμέμνων,
284
καί σφεας φωνήσας ἔπεα πτερόεντα προσηύδα·
285
Αἴαντʼ Ἀργείων ἡγήτορε χαλκοχιτώνων,
286
σφῶϊ μέν· οὐ γὰρ ἔοικʼ ὀτρυνέμεν· οὔ τι κελεύω·
287
αὐτὼ γὰρ μάλα λαὸν ἀνώγετον ἶφι μάχεσθαι.
288
αἲ γὰρ Ζεῦ τε πάτερ καὶ Ἀθηναίη καὶ Ἄπολλον
289
τοῖος πᾶσιν θυμὸς ἐνὶ στήθεσσι γένοιτο·
290
τώ κε τάχʼ ἠμύσειε πόλις Πριάμοιο ἄνακτος
291
χερσὶν ὑφʼ ἡμετέρῃσιν ἁλοῦσά τε περθομένη τε.
292
ὣς εἰπὼν τοὺς μὲν λίπεν αὐτοῦ, βῆ δὲ μετʼ ἄλλους·
293
ἔνθʼ ὅ γε Νέστορʼ ἔτετμε λιγὺν Πυλίων ἀγορητὴν
294
οὓς ἑτάρους στέλλοντα καὶ ὀτρύνοντα μάχεσθαι
295
ἀμφὶ μέγαν Πελάγοντα Ἀλάστορά τε Χρομίον τε
296
Αἵμονά τε κρείοντα Βίαντά τε ποιμένα λαῶν·
297
ἱππῆας μὲν πρῶτα σὺν ἵπποισιν καὶ ὄχεσφι,
298
πεζοὺς δʼ ἐξόπιθε στῆσεν πολέας τε καὶ ἐσθλοὺς
299
ἕρκος ἔμεν πολέμοιο· κακοὺς δʼ ἐς μέσσον ἔλασσεν,
300
ὄφρα καὶ οὐκ ἐθέλων τις ἀναγκαίῃ πολεμίζοι.
301
ἱππεῦσιν μὲν πρῶτʼ ἐπετέλλετο· τοὺς γὰρ ἀνώγει
302
σφοὺς ἵππους ἐχέμεν μηδὲ κλονέεσθαι ὁμίλῳ·
303
μηδέ τις ἱπποσύνῃ τε καὶ ἠνορέηφι πεποιθὼς
304
οἶος πρόσθʼ ἄλλων μεμάτω Τρώεσσι μάχεσθαι,
305
μηδʼ ἀναχωρείτω· ἀλαπαδνότεροι γὰρ ἔσεσθε.
306
ὃς δέ κʼ ἀνὴρ ἀπὸ ὧν ὀχέων ἕτερʼ ἅρμαθʼ ἵκηται
307
ἔγχει ὀρεξάσθω, ἐπεὶ ἦ πολὺ φέρτερον οὕτω.
308
ὧδε καὶ οἱ πρότεροι πόλεας καὶ τείχεʼ ἐπόρθεον
309
τόνδε νόον καὶ θυμὸν ἐνὶ στήθεσσιν ἔχοντες.
310
ὣς ὃ γέρων ὄτρυνε πάλαι πολέμων ἐῢ εἰδώς·
311
καὶ τὸν μὲν γήθησεν ἰδὼν κρείων Ἀγαμέμνων,
312
καί μιν φωνήσας ἔπεα πτερόεντα προσηύδα·
313
ὦ γέρον εἴθʼ ὡς θυμὸς ἐνὶ στήθεσσι φίλοισιν
314
ὥς τοι γούναθʼ ἕποιτο, βίη δέ τοι ἔμπεδος εἴη·
315
ἀλλά σε γῆρας τείρει ὁμοίϊον· ὡς ὄφελέν τις
316
ἀνδρῶν ἄλλος ἔχειν, σὺ δὲ κουροτέροισι μετεῖναι.
317
τὸν δʼ ἠμείβετʼ ἔπειτα Γερήνιος ἱππότα Νέστωρ·
318
Ἀτρεΐδη μάλα μέν τοι ἐγὼν ἐθέλοιμι καὶ αὐτὸς
319
ὣς ἔμεν ὡς ὅτε δῖον Ἐρευθαλίωνα κατέκταν.
320
ἀλλʼ οὔ πως ἅμα πάντα θεοὶ δόσαν ἀνθρώποισιν·
321
εἰ τότε κοῦρος ἔα νῦν αὖτέ με γῆρας ὀπάζει.
322
ἀλλὰ καὶ ὧς ἱππεῦσι μετέσσομαι ἠδὲ κελεύσω
323
βουλῇ καὶ μύθοισι· τὸ γὰρ γέρας ἐστὶ γερόντων.
324
αἰχμὰς δʼ αἰχμάσσουσι νεώτεροι, οἵ περ ἐμεῖο
325
ὁπλότεροι γεγάασι πεποίθασίν τε βίηφιν.
326
ὣς ἔφατʼ, Ἀτρεΐδης δὲ παρῴχετο γηθόσυνος κῆρ.
327
εὗρʼ υἱὸν Πετεῶο Μενεσθῆα πλήξιππον
328
ἑσταότʼ· ἀμφὶ δʼ Ἀθηναῖοι μήστωρες ἀϋτῆς·
329
αὐτὰρ ὃ πλησίον ἑστήκει πολύμητις Ὀδυσσεύς,
330
πὰρ δὲ Κεφαλλήνων ἀμφὶ στίχες οὐκ ἀλαπαδναὶ
331
ἕστασαν· οὐ γάρ πώ σφιν ἀκούετο λαὸς ἀϋτῆς,
332
ἀλλὰ νέον συνορινόμεναι κίνυντο φάλαγγες
333
Τρώων ἱπποδάμων καὶ Ἀχαιῶν· οἳ δὲ μένοντες
334
ἕστασαν ὁππότε πύργος Ἀχαιῶν ἄλλος ἐπελθὼν
335
Τρώων ὁρμήσειε καὶ ἄρξειαν πολέμοιο.
336
τοὺς δὲ ἰδὼν νείκεσσεν ἄναξ ἀνδρῶν Ἀγαμέμνων,
337
καί σφεας φωνήσας ἔπεα πτερόεντα προσηύδα·
338
ὦ υἱὲ Πετεῶο διοτρεφέος βασιλῆος,
339
καὶ σὺ κακοῖσι δόλοισι κεκασμένε κερδαλεόφρον
340
τίπτε καταπτώσσοντες ἀφέστατε, μίμνετε δʼ ἄλλους;
341
σφῶϊν μέν τʼ ἐπέοικε μετὰ πρώτοισιν ἐόντας
342
ἑστάμεν ἠδὲ μάχης καυστείρης ἀντιβολῆσαι·
343
πρώτω γὰρ καὶ δαιτὸς ἀκουάζεσθον ἐμεῖο,
344
ὁππότε δαῖτα γέρουσιν ἐφοπλίζωμεν Ἀχαιοί.
345
ἔνθα φίλʼ ὀπταλέα κρέα ἔδμεναι ἠδὲ κύπελλα
346
οἴνου πινέμεναι μελιηδέος ὄφρʼ ἐθέλητον·
347
νῦν δὲ φίλως χʼ ὁρόῳτε καὶ εἰ δέκα πύργοι Ἀχαιῶν
348
ὑμείων προπάροιθε μαχοίατο νηλέϊ χαλκῷ.
349
τὸν δʼ ἄρʼ ὑπόδρα ἰδὼν προσέφη πολύμητις Ὀδυσσεύς·
350
Ἀτρεΐδη ποῖόν σε ἔπος φύγεν ἕρκος ὀδόντων;
351
πῶς δὴ φῂς πολέμοιο μεθιέμεν ὁππότʼ Ἀχαιοὶ
352
Τρωσὶν ἐφʼ ἱπποδάμοισιν ἐγείρομεν ὀξὺν Ἄρηα;
353
ὄψεαι αἴ κʼ ἐθέλῃσθα καὶ αἴ κέν τοι τὰ μεμήλῃ
354
Τηλεμάχοιο φίλον πατέρα προμάχοισι μιγέντα
355
Τρώων ἱπποδάμων· σὺ δὲ ταῦτʼ ἀνεμώλια βάζεις.
356
τὸν δʼ ἐπιμειδήσας προσέφη κρείων Ἀγαμέμνων
357
ὡς γνῶ χωομένοιο· πάλιν δʼ ὅ γε λάζετο μῦθον·
358
διογενὲς Λαερτιάδη πολυμήχανʼ Ὀδυσσεῦ
359
οὔτέ σε νεικείω περιώσιον οὔτε κελεύω·
360
οἶδα γὰρ ὥς τοι θυμὸς ἐνὶ στήθεσσι φίλοισιν
361
ἤπια δήνεα οἶδε· τὰ γὰρ φρονέεις ἅ τʼ ἐγώ περ.
362
ἀλλʼ ἴθι ταῦτα δʼ ὄπισθεν ἀρεσσόμεθʼ εἴ τι κακὸν νῦν
363
εἴρηται, τὰ δὲ πάντα θεοὶ μεταμώνια θεῖεν.
364
ὣς εἰπὼν τοὺς μὲν λίπεν αὐτοῦ, βῆ δὲ μετʼ ἄλλους.
365
εὗρε δὲ Τυδέος υἱὸν ὑπέρθυμον Διομήδεα
366
ἑσταότʼ ἔν θʼ ἵπποισι καὶ ἅρμασι κολλητοῖσι·
367
πὰρ δέ οἱ ἑστήκει Σθένελος Καπανήϊος υἱός.
368
καὶ τὸν μὲν νείκεσσεν ἰδὼν κρείων Ἀγαμέμνων,
369
καί μιν φωνήσας ἔπεα πτερόεντα προσηύδα·
370
ὤ μοι Τυδέος υἱὲ δαΐφρονος ἱπποδάμοιο
371
τί πτώσσεις, τί δʼ ὀπιπεύεις πολέμοιο γεφύρας;
372
οὐ μὲν Τυδέϊ γʼ ὧδε φίλον πτωσκαζέμεν ἦεν,
373
ἀλλὰ πολὺ πρὸ φίλων ἑτάρων δηΐοισι μάχεσθαι,
374
ὡς φάσαν οἵ μιν ἴδοντο πονεύμενον· οὐ γὰρ ἔγωγε
375
ἤντησʼ οὐδὲ ἴδον· περὶ δʼ ἄλλων φασὶ γενέσθαι.
376
ἤτοι μὲν γὰρ ἄτερ πολέμου εἰσῆλθε Μυκήνας
377
ξεῖνος ἅμʼ ἀντιθέῳ Πολυνείκεϊ λαὸν ἀγείρων·
378
οἳ δὲ τότʼ ἐστρατόωνθʼ ἱερὰ πρὸς τείχεα Θήβης,
379
καί ῥα μάλα λίσσοντο δόμεν κλειτοὺς ἐπικούρους·
380
οἳ δʼ ἔθελον δόμεναι καὶ ἐπῄνεον ὡς ἐκέλευον·
381
ἀλλὰ Ζεὺς ἔτρεψε παραίσια σήματα φαίνων.
382
οἳ δʼ ἐπεὶ οὖν ᾤχοντο ἰδὲ πρὸ ὁδοῦ ἐγένοντο,
383
Ἀσωπὸν δʼ ἵκοντο βαθύσχοινον λεχεποίην,
384
ἔνθʼ αὖτʼ ἀγγελίην ἐπὶ Τυδῆ στεῖλαν Ἀχαιοί.
385
αὐτὰρ ὃ βῆ, πολέας δὲ κιχήσατο Καδμεΐωνας
386
δαινυμένους κατὰ δῶμα βίης Ἐτεοκληείης.
387
ἔνθʼ οὐδὲ ξεῖνός περ ἐὼν ἱππηλάτα Τυδεὺς
388
τάρβει, μοῦνος ἐὼν πολέσιν μετὰ Καδμείοισιν,
389
ἀλλʼ ὅ γʼ ἀεθλεύειν προκαλίζετο, πάντα δʼ ἐνίκα
390
ῥηϊδίως· τοίη οἱ ἐπίρροθος ἦεν Ἀθήνη.
391
οἳ δὲ χολωσάμενοι Καδμεῖοι κέντορες ἵππων
392
ἂψ ἄρʼ ἀνερχομένῳ πυκινὸν λόχον εἷσαν ἄγοντες
393
κούρους πεντήκοντα· δύω δʼ ἡγήτορες ἦσαν,
394
Μαίων Αἱμονίδης ἐπιείκελος ἀθανάτοισιν,
395
υἱός τʼ Αὐτοφόνοιο μενεπτόλεμος Πολυφόντης.
396
Τυδεὺς μὲν καὶ τοῖσιν ἀεικέα πότμον ἐφῆκε·
397
πάντας ἔπεφνʼ, ἕνα δʼ οἶον ἵει οἶκον δὲ νέεσθαι·
398
Μαίονʼ ἄρα προέηκε θεῶν τεράεσσι πιθήσας.
399
τοῖος ἔην Τυδεὺς Αἰτώλιος· ἀλλὰ τὸν υἱὸν
400
γείνατο εἷο χέρεια μάχῃ, ἀγορῇ δέ τʼ ἀμείνω.
401
ὣς φάτο, τὸν δʼ οὔ τι προσέφη κρατερὸς Διομήδης
402
αἰδεσθεὶς βασιλῆος ἐνιπὴν αἰδοίοιο·
403
τὸν δʼ υἱὸς Καπανῆος ἀμείψατο κυδαλίμοιο·
404
Ἀτρεΐδη μὴ ψεύδεʼ ἐπιστάμενος σάφα εἰπεῖν·
405
ἡμεῖς τοι πατέρων μέγʼ ἀμείνονες εὐχόμεθʼ εἶναι·
406
ἡμεῖς καὶ Θήβης ἕδος εἵλομεν ἑπταπύλοιο
407
παυρότερον λαὸν ἀγαγόνθʼ ὑπὸ τεῖχος ἄρειον,
408
πειθόμενοι τεράεσσι θεῶν καὶ Ζηνὸς ἀρωγῇ·
409
κεῖνοι δὲ σφετέρῃσιν ἀτασθαλίῃσιν ὄλοντο·
410
τὼ μή μοι πατέρας ποθʼ ὁμοίῃ ἔνθεο τιμῇ.
411
τὸν δʼ ἄρʼ ὑπόδρα ἰδὼν προσέφη κρατερὸς Διομήδης·
412
τέττα, σιωπῇ ἧσο, ἐμῷ δʼ ἐπιπείθεο μύθῳ·
413
οὐ γὰρ ἐγὼ νεμεσῶ Ἀγαμέμνονι ποιμένι λαῶν
414
ὀτρύνοντι μάχεσθαι ἐϋκνήμιδας Ἀχαιούς·
415
τούτῳ μὲν γὰρ κῦδος ἅμʼ ἕψεται εἴ κεν Ἀχαιοὶ
416
Τρῶας δῃώσωσιν ἕλωσί τε Ἴλιον ἱρήν,
417
τούτῳ δʼ αὖ μέγα πένθος Ἀχαιῶν δῃωθέντων.
418
ἀλλʼ ἄγε δὴ καὶ νῶϊ μεδώμεθα θούριδος ἀλκῆς.
419
ἦ ῥα καὶ ἐξ ὀχέων σὺν τεύχεσιν ἆλτο χαμᾶζε·
420
δεινὸν δʼ ἔβραχε χαλκὸς ἐπὶ στήθεσσιν ἄνακτος
421
ὀρνυμένου· ὑπό κεν ταλασίφρονά περ δέος εἷλεν.
422
ὡς δʼ ὅτʼ ἐν αἰγιαλῷ πολυηχέϊ κῦμα θαλάσσης
423
ὄρνυτʼ ἐπασσύτερον Ζεφύρου ὕπο κινήσαντος·
424
πόντῳ μέν τε πρῶτα κορύσσεται, αὐτὰρ ἔπειτα
425
χέρσῳ ῥηγνύμενον μεγάλα βρέμει, ἀμφὶ δέ τʼ ἄκρας
426
κυρτὸν ἐὸν κορυφοῦται, ἀποπτύει δʼ ἁλὸς ἄχνην·
427
ὣς τότʼ ἐπασσύτεραι Δαναῶν κίνυντο φάλαγγες
428
νωλεμέως πόλεμον δέ· κέλευε δὲ οἷσιν ἕκαστος
429
ἡγεμόνων· οἳ δʼ ἄλλοι ἀκὴν ἴσαν, οὐδέ κε φαίης
430
τόσσον λαὸν ἕπεσθαι ἔχοντʼ ἐν στήθεσιν αὐδήν,
431
σιγῇ δειδιότες σημάντορας· ἀμφὶ δὲ πᾶσι
432
τεύχεα ποικίλʼ ἔλαμπε, τὰ εἱμένοι ἐστιχόωντο.
433
Τρῶες δʼ, ὥς τʼ ὄϊες πολυπάμονος ἀνδρὸς ἐν αὐλῇ
434
μυρίαι ἑστήκασιν ἀμελγόμεναι γάλα λευκὸν
435
ἀζηχὲς μεμακυῖαι ἀκούουσαι ὄπα ἀρνῶν,
436
ὣς Τρώων ἀλαλητὸς ἀνὰ στρατὸν εὐρὺν ὀρώρει·
437
οὐ γὰρ πάντων ἦεν ὁμὸς θρόος οὐδʼ ἴα γῆρυς,
438
ἀλλὰ γλῶσσα μέμικτο, πολύκλητοι δʼ ἔσαν ἄνδρες.
439
ὄρσε δὲ τοὺς μὲν Ἄρης, τοὺς δὲ γλαυκῶπις Ἀθήνη
440
Δεῖμός τʼ ἠδὲ Φόβος καὶ Ἔρις ἄμοτον μεμαυῖα,
441
Ἄρεος ἀνδροφόνοιο κασιγνήτη ἑτάρη τε,
442
ἥ τʼ ὀλίγη μὲν πρῶτα κορύσσεται, αὐτὰρ ἔπειτα
443
οὐρανῷ ἐστήριξε κάρη καὶ ἐπὶ χθονὶ βαίνει·
444
ἥ σφιν καὶ τότε νεῖκος ὁμοίϊον ἔμβαλε μέσσῳ
445
ἐρχομένη καθʼ ὅμιλον ὀφέλλουσα στόνον ἀνδρῶν.
446
οἳ δʼ ὅτε δή ῥʼ ἐς χῶρον ἕνα ξυνιόντες ἵκοντο,
447
σύν ῥʼ ἔβαλον ῥινούς, σὺν δʼ ἔγχεα καὶ μένεʼ ἀνδρῶν
448
χαλκεοθωρήκων· ἀτὰρ ἀσπίδες ὀμφαλόεσσαι
449
ἔπληντʼ ἀλλήλῃσι, πολὺς δʼ ὀρυμαγδὸς ὀρώρει.
450
ἔνθα δʼ ἅμʼ οἰμωγή τε καὶ εὐχωλὴ πέλεν ἀνδρῶν
451
ὀλλύντων τε καὶ ὀλλυμένων, ῥέε δʼ αἵματι γαῖα.
452
ὡς δʼ ὅτε χείμαρροι ποταμοὶ κατʼ ὄρεσφι ῥέοντες
453
ἐς μισγάγκειαν συμβάλλετον ὄβριμον ὕδωρ
454
κρουνῶν ἐκ μεγάλων κοίλης ἔντοσθε χαράδρης,
455
τῶν δέ τε τηλόσε δοῦπον ἐν οὔρεσιν ἔκλυε ποιμήν·
456
ὣς τῶν μισγομένων γένετο ἰαχή τε πόνος τε.
457
πρῶτος δʼ Ἀντίλοχος Τρώων ἕλεν ἄνδρα κορυστὴν
458
ἐσθλὸν ἐνὶ προμάχοισι Θαλυσιάδην Ἐχέπωλον·
459
τόν ῥʼ ἔβαλε πρῶτος κόρυθος φάλον ἱπποδασείης,
460
ἐν δὲ μετώπῳ πῆξε, πέρησε δʼ ἄρʼ ὀστέον εἴσω
461
αἰχμὴ χαλκείη· τὸν δὲ σκότος ὄσσε κάλυψεν,
462
ἤριπε δʼ ὡς ὅτε πύργος ἐνὶ κρατερῇ ὑσμίνῃ.
463
τὸν δὲ πεσόντα ποδῶν ἔλαβε κρείων Ἐλεφήνωρ
464
Χαλκωδοντιάδης μεγαθύμων ἀρχὸς Ἀβάντων,
465
ἕλκε δʼ ὑπʼ ἐκ βελέων, λελιημένος ὄφρα τάχιστα
466
τεύχεα συλήσειε· μίνυνθα δέ οἱ γένεθʼ ὁρμή.
467
νεκρὸν γὰρ ἐρύοντα ἰδὼν μεγάθυμος Ἀγήνωρ
468
πλευρά, τά οἱ κύψαντι παρʼ ἀσπίδος ἐξεφαάνθη,
469
οὔτησε ξυστῷ χαλκήρεϊ, λῦσε δὲ γυῖα.
470
ὣς τὸν μὲν λίπε θυμός, ἐπʼ αὐτῷ δʼ ἔργον ἐτύχθη
471
ἀργαλέον Τρώων καὶ Ἀχαιῶν· οἳ δὲ λύκοι ὣς
472
ἀλλήλοις ἐπόρουσαν, ἀνὴρ δʼ ἄνδρʼ ἐδνοπάλιζεν.
473
ἔνθʼ ἔβαλʼ Ἀνθεμίωνος υἱὸν Τελαμώνιος Αἴας
474
ἠΐθεον θαλερὸν Σιμοείσιον, ὅν ποτε μήτηρ
475
Ἴδηθεν κατιοῦσα παρʼ ὄχθῃσιν Σιμόεντος
476
γείνατʼ, ἐπεί ῥα τοκεῦσιν ἅμʼ ἕσπετο μῆλα ἰδέσθαι·
477
τοὔνεκά μιν κάλεον Σιμοείσιον· οὐδὲ τοκεῦσι
478
θρέπτρα φίλοις ἀπέδωκε, μινυνθάδιος δέ οἱ αἰὼν
479
ἔπλεθʼ ὑπʼ Αἴαντος μεγαθύμου δουρὶ δαμέντι.
480
πρῶτον γάρ μιν ἰόντα βάλε στῆθος παρὰ μαζὸν
481
δεξιόν· ἀντικρὺ δὲ διʼ ὤμου χάλκεον ἔγχος
482
ἦλθεν· ὁ δʼ ἐν κονίῃσι χαμαὶ πέσεν αἴγειρος ὣς
483
ἥ ῥά τʼ ἐν εἱαμενῇ ἕλεος μεγάλοιο πεφύκει
484
λείη, ἀτάρ τέ οἱ ὄζοι ἐπʼ ἀκροτάτῃ πεφύασι·
485
τὴν μέν θʼ ἁρματοπηγὸς ἀνὴρ αἴθωνι σιδήρῳ
486
ἐξέταμʼ, ὄφρα ἴτυν κάμψῃ περικαλλέϊ δίφρῳ·
487
ἣ μέν τʼ ἀζομένη κεῖται ποταμοῖο παρʼ ὄχθας.
488
τοῖον ἄρʼ Ἀνθεμίδην Σιμοείσιον ἐξενάριξεν
489
Αἴας διογενής· τοῦ δʼ Ἄντιφος αἰολοθώρηξ
490
Πριαμίδης καθʼ ὅμιλον ἀκόντισεν ὀξέϊ δουρί.
491
τοῦ μὲν ἅμαρθʼ, ὃ δὲ Λεῦκον Ὀδυσσέος ἐσθλὸν ἑταῖρον
492
βεβλήκει βουβῶνα, νέκυν ἑτέρωσʼ ἐρύοντα·
493
ἤριπε δʼ ἀμφʼ αὐτῷ, νεκρὸς δέ οἱ ἔκπεσε χειρός.
494
τοῦ δʼ Ὀδυσεὺς μάλα θυμὸν ἀποκταμένοιο χολώθη,
495
βῆ δὲ διὰ προμάχων κεκορυθμένος αἴθοπι χαλκῷ,
496
στῆ δὲ μάλʼ ἐγγὺς ἰὼν καὶ ἀκόντισε δουρὶ φαεινῷ
497
ἀμφὶ ἓ παπτήνας· ὑπὸ δὲ Τρῶες κεκάδοντο
498
ἀνδρὸς ἀκοντίσσαντος· ὃ δʼ οὐχ ἅλιον βέλος ἧκεν,
499
ἀλλʼ υἱὸν Πριάμοιο νόθον βάλε Δημοκόωντα
500
ὅς οἱ Ἀβυδόθεν ἦλθε παρʼ ἵππων ὠκειάων.
501
τόν ῥʼ Ὀδυσεὺς ἑτάροιο χολωσάμενος βάλε δουρὶ
502
κόρσην· ἣ δʼ ἑτέροιο διὰ κροτάφοιο πέρησεν
503
αἰχμὴ χαλκείη· τὸν δὲ σκότος ὄσσε κάλυψε,
504
δούπησεν δὲ πεσών, ἀράβησε δὲ τεύχεʼ ἐπʼ αὐτῷ.
505
χώρησαν δʼ ὑπό τε πρόμαχοι καὶ φαίδιμος Ἕκτωρ·
506
Ἀργεῖοι δὲ μέγα ἴαχον, ἐρύσαντο δὲ νεκρούς,
507
ἴθυσαν δὲ πολὺ προτέρω· νεμέσησε δʼ Ἀπόλλων
508
Περγάμου ἐκκατιδών, Τρώεσσι δὲ κέκλετʼ ἀΰσας·
509
ὄρνυσθʼ ἱππόδαμοι Τρῶες μηδʼ εἴκετε χάρμης
510
Ἀργείοις, ἐπεὶ οὔ σφι λίθος χρὼς οὐδὲ σίδηρος
511
χαλκὸν ἀνασχέσθαι ταμεσίχροα βαλλομένοισιν·
512
οὐ μὰν οὐδʼ Ἀχιλεὺς Θέτιδος πάϊς ἠϋκόμοιο
513
μάρναται, ἀλλʼ ἐπὶ νηυσὶ χόλον θυμαλγέα πέσσει.
514
ὣς φάτʼ ἀπὸ πτόλιος δεινὸς θεός· αὐτὰρ Ἀχαιοὺς
515
ὦρσε Διὸς θυγάτηρ κυδίστη Τριτογένεια
516
ἐρχομένη καθʼ ὅμιλον, ὅθι μεθιέντας ἴδοιτο.
517
ἔνθʼ Ἀμαρυγκείδην Διώρεα μοῖρα πέδησε·
518
χερμαδίῳ γὰρ βλῆτο παρὰ σφυρὸν ὀκριόεντι
519
κνήμην δεξιτερήν· βάλε δὲ Θρῃκῶν ἀγὸς ἀνδρῶν
520
Πείρως Ἰμβρασίδης ὃς ἄρʼ Αἰνόθεν εἰληλούθει.
521
ἀμφοτέρω δὲ τένοντε καὶ ὀστέα λᾶας ἀναιδὴς
522
ἄχρις ἀπηλοίησεν· ὃ δʼ ὕπτιος ἐν κονίῃσι
523
κάππεσεν ἄμφω χεῖρε φίλοις ἑτάροισι πετάσσας
524
θυμὸν ἀποπνείων· ὃ δʼ ἐπέδραμεν ὅς ῥʼ ἔβαλέν περ
525
Πείροος, οὖτα δὲ δουρὶ παρʼ ὀμφαλόν· ἐκ δʼ ἄρα πᾶσαι
526
χύντο χαμαὶ χολάδες, τὸν δὲ σκότος ὄσσε κάλυψε.
527
τὸν δὲ Θόας Αἰτωλὸς ἀπεσσύμενον βάλε δουρὶ
528
στέρνον ὑπὲρ μαζοῖο, πάγη δʼ ἐν πνεύμονι χαλκός·
529
ἀγχίμολον δέ οἱ ἦλθε Θόας, ἐκ δʼ ὄβριμον ἔγχος
530
ἐσπάσατο στέρνοιο, ἐρύσσατο δὲ ξίφος ὀξύ,
531
τῷ ὅ γε γαστέρα τύψε μέσην, ἐκ δʼ αἴνυτο θυμόν.
532
τεύχεα δʼ οὐκ ἀπέδυσε· περίστησαν γὰρ ἑταῖροι
533
Θρήϊκες ἀκρόκομοι δολίχʼ ἔγχεα χερσὶν ἔχοντες,
534
οἵ ἑ μέγαν περ ἐόντα καὶ ἴφθιμον καὶ ἀγαυὸν
535
ὦσαν ἀπὸ σφείων· ὃ δὲ χασσάμενος πελεμίχθη.
536
ὣς τώ γʼ ἐν κονίῃσι παρʼ ἀλλήλοισι τετάσθην,
537
ἤτοι ὃ μὲν Θρῃκῶν, ὃ δʼ Ἐπειῶν χαλκοχιτώνων
538
ἡγεμόνες· πολλοὶ δὲ περὶ κτείνοντο καὶ ἄλλοι.
539
ἔνθά κεν οὐκέτι ἔργον ἀνὴρ ὀνόσαιτο μετελθών,
540
ὅς τις ἔτʼ ἄβλητος καὶ ἀνούτατος ὀξέϊ χαλκῷ
541
δινεύοι κατὰ μέσσον, ἄγοι δέ ἑ Παλλὰς Ἀθήνη
542
χειρὸς ἑλοῦσʼ, αὐτὰρ βελέων ἀπερύκοι ἐρωήν·
543
πολλοὶ γὰρ Τρώων καὶ Ἀχαιῶν ἤματι κείνῳ
544
πρηνέες ἐν κονίῃσι παρʼ ἀλλήλοισι τέταντο.